“Əhalinin artıq pul ödəməməsi üçün dövlət bu sahəyə subsidiyalar verməlidir” – Nazir müavini
Noyabr 19
10:52
2019
"Bu gün ənənəvi elektrik stansiyalarına qoyulan investisiyaları tamamilə alternativ və bərpaolunan enerji mənbələrinə yönəltsək həmin effekti ala bilmərik. Üstəlik, bu, ölkədə elektrik enerjisinin qiymətinin artmasına gətirib çıxarar”.
Bunu "Report”a açıqlamasında Energetika nazirinin müavini Elnur Soltanov deyib.
"Ən mühafizəkar hesablamalara görə, enerji istehsalı potensialımız pik vaxtlarda belə tələbatımızdan azı 10% çoxdur. Bu da çox yaxşı göstəricidir. Yəni, Azərbaycan özünü enerji təhlükəsizliyi baxımından "güvənli sular”da hiss edə bilər. Çox etibarlı bir nöqtədəyik. Artıq liberallaşma üçün əla zəmin yaranıb.
Təhlükəsizlik məsələsi həll olunduğuna görə, bu təhlükəsiz mühitdən daha çox səmərə əldə etməyə fokuslanmalıyıq.
Alternativ və bərpa olunan enerji istehsalına gəlincə isə burada problem ondan ibarətdir ki, onun qiyməti hələ də ənənəvi enerjidən yüksəkdir. O cümlədən də Azərbaycanda. Məsələn, hazırda Avropa ölkələrində ənənəvi yolla istehsal edilən 1 kVt/saat elektrik enerjisinin maya dəyəri orta hesabla 35 qəpik, Azərbaycanda isə 8 qəpikdir. Ölkəmizdə alternativ enerjinin maya dəyəri isə 10-12 qəpikdir. Bu fərqlə enerjini əhaliyə transfer etsək sosial çətinliklər ortaya çıxa bilər. Əhalinin artıq pul ödəməməsi üçün dövlət bu sahəyə subsidiyalar verməlidir”, – o bildirib.