Ali məktəblərin müəllimlərinə fərqli məbləğli əmək haqqı verməyə marağı artıb
Dekabr 26
11:42
2015
Azərbaycanda son 2-3 ildə ali məktəblər differensiyallaşdırılmış əmək haqqı sisteminin tətbiqinə daha çox meyillidirlər.
Qlobalinfo.az xəbər verir ki, bunu Trend-ə Təhsil Nazirliyinin sektor müdiri Sülhəddin Gözəlov deyib.
Onun sözlərinə görə, ali məktəblərin hamısında differensiyallaşdırılmış əmək haqqı sistemi tətbiq edilir. Sadəcə olaraq, məktəblərdə bu sistemin tətbiqinin əhatə dairəsi fərqli ola bilər.
Nazirlik rəsmisi əlavə edib ki, Azərbaycan Prezidenti İlham Əliyevin ali təhsil müəssisələrində adambaşına maliyyələşdirmə sisteminin tətbiqi ilə bağlı verdiyi sərəncama müvafiq olaraq, 2010-cu ildən ali məktəblərdə maliyyə vəsaitlərinin qazanılması səlahiyyəti onların özlərinə verilib: "Bu da imkan verir ki, ali məktəblər özləri müəllimlərinə differensiyallaşdırılmış şəkildə əmək haqqı versinlər. Son 2-3 ildə ali məktəblərin bu sistemə meyilliyinin artmasının əsas səbəbi ali məktəblər qarşısında kadr hazırlığının keyfiyyətinin yüksəldilməsi üçün ciddi tələblərin qoyulmasıdır”.
S.Gözəlov deyib ki, kadr hazırlığının keyfiyyətinin yüksəldilməsində başlıca amil müəllim amilidir.
Nazirlik rəsmisi hesab edir ki, kadr hazırlığına keyfiyyətli müəllim cəlb edə bilməyən məktəb keyfiyyətli kadr da hazırlaya bilməyəcək:
"Buna görə də ali məktəblər dilemma qarşısındadırlar və hesab edirlər ki, yaxşı müəllimi cəlb edə bilməsələr, nəticələri də olmayacaq. Bu baxımdan differensiyallaşdırılmış əmək haqqı sistemininin tətbiqinə üstünlük verirlər”.
S.Gözəlov əlavə edib ki, Azərbaycanın ali məktəblərinə artıq yüksək səviyyədə muxtariyyət verilib: "Bu muxtariyyət mütləq mənada həm maliyyə, həm idarəçilik, həm də akademik sahədədir. Maliyyə muxtariyyəti ali təhsilin səviyyəsinin, keyfiyyətinin yüksəldilməsinə imkan verən bir mexanizm, alətdir. Ali məktəblərin rəhbərlərinə bu mənada sərbəstlik verilib ki, təhsil müəssisəsində işləyən əməkdaşlarının əmək fəaliyyətlərini differensiyallaşdırılmış şəkildə qiymətləndirə bilsinlər. Onlar professor-müəllim heyətlərinin tədris prosesindəki fəaliyyətinin keyfiyyətinin fərqini nəzərə alaraq, fərqli əmək haqqı verə bilərlər. 30 illik professorun aldığı yüksək əmək haqqını 5 illik təcrübəsi olan, yüksək keyfiyyətə, müasir düşüncəyə, bacarıqlara malik olan hər hansı bir xarici aparıcı universitetin məzunu da ala bilər. Bütövlükdə, bu proses kadr hazırlığının və təhsilin keyfiyyətinin yüksəldilməsinə imkan verər”.
