Bu deputat “Stadion qalmaqalı”na görə məhkəməyə çağırıla bilər
İyul 08
05:43
2023
Azərbaycan Həmkarlar İttifaqları Konfederasiyasının (AHİK) sədri, deputat Səttar Möhbalıyevin də adının hallandığı "stadion qalmaqalı” ilə bağlı növbəti məhkəmə prosesinin vaxtı hələ müəyyən edilməyib.
Hər iki şəxs Cinayət Məcəlləsinin 178.4 (xüsusilə külli miqdarda ziyan vurmaqla dələduzluq) və 32.4, 312.1 (rüşvət verməyə təhrik etmə) və 32.4, 312.2-ci (rüşvət verməyə təkrarən təhrik etmə) maddələri ilə təqsirləndirilir.
Qaynarinfo xəbər verir ki, işlə bağlı sonuncu proses iyunun 21-də baş tutub.
Zərərçəkənlər və təqsirləndirilən şəxslər Səttar Möhbalıyevin dindirilməsini istəyib. Bununla bağlı vəsatətə də qaldırılıb.
Əldə etdiyimiz məlumata görə, növbəti prosesdə bu məsələyə baxıla bilər. Ehtimal olunur ki, zərərçəkənlərin və təqsirləndirilən şəxslərin israrları nəzərə alınacaq.
Məlumat üçün deyək ki, proses Bakı Ağır Cinayətlər Məhkəməsində keçirilir. İş üzrə iki təqsirləndirilən şəxs var. Onlardan biri Azərbaycan Həmkarlar İttifaqlarının İdman Təşkilatları Assosiasiyasının keçmiş sədri Nadir Əliyev, digəri isə "Yasamal” idman-sağlamlıq klubunun sabiq direktoru Alik Həsənovdur.
