İnamlı başçılar – Prezident onlara niyə etimad göstərdi?
İyul 26
11:57
2022
Bu gün Prezident İlham Əliyevin sərəncamı ilə üç rayona – Lerik, Masallı və Göygölə yeni icra başçıları təyin edildi.
Bakupost.az xəbər verir ki, onlardan ikisi – Lerik və Göygölün yeni icra başçıları – Əkbər Abbasov və Elvin Paşayev bu təyinatdan öncə Kənd Təsərrüfatı Nazirliyində çalışıblar.
Buna görə də yeni başçılar Kənd Təsərrüfatı naziri İnam Kərimovun kadrları hesab olunur.
Göygöl Rayon İcra Hakimiyyətinin başçısı Elvin Paşayev Kənd Təsərrüfatı Nazirliyində Aparat rəhbərinin müavini, İnsan Resursları şöbəsinin müdiri vəzifəsində işləyib. Bundan əvvəl "ASAN Xidmət”də şöbə müdiri vəzifələrində çalışıb. Bununla yanaşı, o, Azərbaycan İnsan Resursları Assosiasiyası İctimai Birliyinin (AİRA) təsisçilərindən biridir. Elvin Paşayev "Yeni klinika” tibb müəssisəsinin baş həkimi Cavid Paşayevin qardaşıdır.
Lerik Rayon İcra Hakimiyyətinin başçısı Əkbər Abbasov isə Azərbaycan Dövlət İqtisad Universitetində Beynəlxalq iqtisadi münasibətlər ixtisası üzrə bakalavriat, Avropa London Biznes Məktəbində Maliyyə menecmenti ixtisası üzrə magistratura, Azərbaycan Milli Elmlər Akademiyasında Texnoloji İnnovasiyalar İqtisadiyyatı ixtisası üzrə aspirantura/doktorantura təhsili alıb. Ə. Abbasov da Kənd Təsərrüfatı Nazirliyində çalışıb. O, nazirliyin Aqrar Elm və İnnovasiya Mərkəzində direktor vəzifəsində işləyib.
Mənbənin bildirdiyinə görə, həmin kadrların yüksək vəzifəyə təyinatı həm də sözügedən rayonlarda kənd təsərrüfatıyla bağlı ciddi problemlərlə əlaqədardır. Belə ki, ötən illərdə regionların sosial-iqtisadi inkişafı ilə bağlı bir çox işlər görülsə, infrastruktur layihələri həyata keçirilsə də, regionlarda bir sıra problemlər hələ də həll olunmamış qalır:
"Xüsusən də kənd təsərrüfatının inkişafı ilə bağlı problemlər mövcuddur. Rayonlarda yollar çəkilsə, qazlaşdırma aparılsa da, suvarma, kənd təsərrüfatı məhsullarının istehsalı qənaətbəxş vəziyyətdə deyil. Hazırda qlobal iqtisadi böhran fonunda kənd təsərrüfatı sahələrinin – xüsusən də taxılçılıq, pambıq, üzümçülüyün, meyvə-tərəvəz istehsalının artırılması hökumətin qarşısına prioritet məsələ kimi qoyulub. Məhz bu səbəbdən yeni təyinatlarda kənd təsərrüfatı sahəsi üzrə ixtisaslaşan, bu sahədə təcrübəsi olan kadrlara üstünlük verilir. Güman ki, yeni təyinatlarda nazir İnam Kərimovun da rəyi nəzərə alınıb”.
Qeyd edək ki, Prezident İlham Əliyev yeni icra başçıları ilə görüşündə bölgələrdə mövcud olan problemlərə toxunub və onlara bir sıra tapşırıqlar verib.
Qlobal.Az
