""Moskva"nın yerini ABŞ kəşfiyyatı nişan verib" - Qərb mediası
May 06
13:42
2022
"Ötən ay Ukraynanın Rusiya donanmasının flaqman gəmisi "Moskva”nı batırmasında ABŞ kəşfiyyatının köməyi olub". "AzPolitika.info" xəbər verir ki, bu haqda "The New York Times”, "NBC News” xəbər yayıblar.
"Moskva” kreyseri aprelin ortasında batıb. Ukrayna onu Neptun raketləri ilə vurduğunu bildirib. Rusiya bunu təkzib edib, gəmidə yanğın baş verdiyini açıqlayıb.
Ukraynanın iki aydan çox davam edən işğalı nəticəsində xeyli sayda Rusiya generalının öldürüldüyü bildirilir, onlardan azı səkkizinin ölümü təsdiqlənib.
"NBC News” mayın 5-də xəbər yayıb ki, ABŞ Ukrayna ordusunun xahişilə "Moskva”nın Qara dənizdəki yerini müəyyənləşdirməyə kömək edib. "The Washington Post” və "The New York Times” isə yazırlar ki, ABŞ hökumətinin Ukraynanın planlarından xəbəri olmayıb.
Kreml gəminin batdığını da rəsmən təsdiqləməyib. Gəmidə naməlum saytda matrosun öldüyü, yaxud itkin düşdüyü bildirilir.
"The New York Times” isə yazır ki, ABŞ rəsmiləri Ukraynaya Rusiya ordusunun mobil qərargahı haqda detalları verib. Ukrayna qüvvələri isə bu informasiyanın köməyilə Rusiya zabitlərini hədəfə alıb.
Pentaqonun sözçüsü Con Korbi ABŞ-ın Kiyevə hərbi kəşfiyyat ötürdüyünü təsdiqləyib. O mayın 5-də deyib ki, döyüş zonasında aparıcı hərbi liderlərin yeri haqda informasiya vermirik, yaxud Ukrayna ordusunun hədəfəalma qərarlarında iştirak etmirik.
Bir gün öncə ABŞ-ın digər media orqanlarının yaydığı xəbərə görə, ABŞ hakimiyyəti Ukrayna qüvvələrini döyüş zonasında Rusiya generallarının hədəfə alınmasına kömək edən kəşfiyyat məlumatıyla təmin edib.
