Naxçıvanda “Rast dəstgahı” muğam məclisi təşkil olunub
Yanvar 29
17:47
2016
Naxçıvan Muxtar Respublikası Mədəniyyət və Turizm Nazirliyinin təşkilatçılığı ilə "Rast dəstgahı” muğam məclisi olub.
Naxçıvan Muxtar Respublikasının Mədəniyyət və Turizm Nazirliyinin mətbuat xidmətindən AZƏRTAC-a bildirilib ki, muğam məclisindən əvvəl Naxçıvan Muxtar Respublikasının mədəniyyət və turizm naziri Natəvan Qədimova çıxış edərək, muğam sənətinin Azərbaycan xalqının bədii yaradıcılığının və musiqi mədəniyyətinin zəngin sərvəti olduğunu bildirib, muğamı nadir sənət nümunəsi adlandırıb.
Vurğulanıb ki, muğam sənətinin qorunub saxlanması və tanıdılması istiqamətində Heydər Əliyev Fondunun həyata keçirdiyi silsilə tədbirlər müstəsna rol oynayır.
Son illər ölkəmizdə bir sıra irimiqyaslı layihələr həyata keçirilib, muğam müsabiqələri təşkil olunub, "Qarabağ xanəndələri” albomu buraxılıb, "Muğam” jurnalı, "Muğam ensiklopediyası” nəşr edilib. Azərbaycanda 2009-cu ildən başlayaraq iki ildən bir Beynəlxalq Muğam Festivalı və bu festival çərçivəsində beynəlxalq "Muğam aləmi” simpoziumu keçirilir.
Qeyd olunub ki, muxtar respublikada da muğam sənətinin yaşadılması istiqamətində ardıcıl tədbirlər görülür. Naxçıvan Muxtar Respublikası Ali Məclisi Sədrinin "Naxçıvan Muxtar Respublikasında Xalq yaradıcılığı günlərinin keçirilməsi haqqında” 2009-cu il fevralın 7-də imzaladığı Sərəncama əsasən keçirilən Xalq yaradıcılığı günlərində zəngin folklor nümunələri ilə yanaşı, muğamlarımız da gənc nəslə aşılanır.
2012-ci ildə keçirilən "Milli dəyərlərimiz – milli sərvətimiz” folklor və muğam müsabiqəsi ictimaiyyət tərəfindən maraqla qarşılanıb.
Sonra tədbirin bədii hissəsi başlayıb.
"Rast dəstgahı” muğam məclisində xanəndə və müğənnilərdən Azərbaycan Respublikasının Əməkdar artistləri Qurban Qasımov, Vilayət İsmayılov, Naxçıvan Muxtar Respublikasının Əməkdar artistləri Hünər Əliyev, Xatirə Səfərova, müğənnilərdən Qəribə Həsənova, Nərmin Hüseynova "Rast”ın "Üşşaq”, "Hüseyni”, "Vilayəti”, "Əmiri”, "Əraq” və başqa şöbə və guşələrindən ibarət dəstgah səsləndiriblər.
Muğam ifaçılarını Azərbaycan Respublikasının Əməkdar Artisti Elman Əliyev (tarda), Naxçıvan Muxtar Respublikasının Əməkdar artistləri Aqib Seyidov (kamançada), Qasım Bağırov (balabanda), Məmmədəli Babayev (nağarada), Sevinc Babayeva (kamançada), Sərxan Abdullayev (udda) müşayiət ediblər.
Qlobal.az
