Putinin Ukrayna ilə bağlı "Sibir planı" varmış
May 05
11:42
2022
Ukrayna Milli Təhlükəsizlik və Müdafiə Şurasının katibi Aleksey Danilov bildirib ki, Rusiya Federasiyası ukraynalıları tutaraq Sibirə yerləşdirməyi çoxdan planlaşdırıb. Təbliğatçıların planına görə, ukraynalılar orada yeni Rusiya şəhərləri salmalı idilər.
Bizimyol.info xəbər verir ki, Danilov jurnalist Sergey İvanovun "Antipodlar” müəllif proqramının efirində müsahibəsi zamanı danışıb. O qeyd edib ki, işğalçıların üsulları sovet dövründən indiyədək dəyişməyib. Danilov xatırladıb ki, Vladimir Putinin planı ilk dəfə 2021-ci il sentyabrın 6-da işıq üzü görüb. Bu, Rusiyanın müdafiə naziri Sergey Şoyqunun "Sibirdə şəhərlərin inkişafı” ilə bağlı məqaləsi idi. Məqalədə "MDB ölkələrinin vətəndaşları”nın əli ilə regionda böyük şəhərlərin necə tikiləcəyi təsvir edilirdi.
"Plan çoxlu sayda vətəndaşımızı ələ keçirmək və onları rusların və Putinin xəyal etdiyi şəhərləri tikmək üçün ora köçürmək idi”,- deyə Danilov qeyd edir. Onun sözlərinə görə, Kreml rəhbərlərinin də eyni üsulları var, çünki İkinci Dünya Müharibəsi bitdikdən sonra da Sovet hakimiyyəti xeyli ukraynalını Sibirə aparıb.
"Sovet İttifaqından bəri heç nə dəyişməyib. İndi bu təbliğat videoları yayılır, guya ukraynalılar nədənsə narazı olduqlarını deyirlər. Bu, filtrasiya düşərgələridir. Əslində bu, müasir faşizmdir. Adam oğurluğu, işgəncə, adam öldürmə. Rəsmən terrorçuluqdur”,- deyə Danilov qeyd edib.
Bu gün Rusiya Ukraynadan bir milyondan çox ukraynalını, o cümlədən 200 mindən çox uşaq aparıb. Danilov bildirib ki, müharibə başa çatan kimi bütün insanlar evlərinə qaytarılacaq.
Xatırladaq ki, Sibir Rusiya Federasiyasında ərazisi 13 milyon kvadratmetrdən çox olan bir bölgədir. Əhalisi isə təxminən 33 milyon nəfərdir. Şimalda Şimal Buzlu Okeanından, cənubda Qazaxıstan, Monqolustan və Çin meşələrinin, qərbdə Uraldan şərqdə Sakit Okeanın dağ silsilələrinə qədər uzanır.
