Qlobal

"Səba” Broylerin "Halal" adı ilə istifadəyə buraxdığı toyuq məhsulları ilə bağlı görüntü sosial şəbəkələrdə narazılıq yaradıb.

Sosial şəbəkə istifadəçiləri "Səba”nı məzhəb ayrı-seçkiliyində qınayıblar.

Bir neçə aktivist "Səba"nın adı əks olunmuş fotonu paylaşaraq yazıb ki, "Səba"nın satışa çıxardığı məhsulun üzərində vurduğu etiketin üzərində 4 məzhəbin - hənəfi, şafei, hənbəli və maliki məhzəblərinin adı yazılaraq "halal" buyurulub.

Şəbəkə istifadəçiləri şirkətə belə bir sual ünvanlayıblar: "Belə çıxır ki, məhsul digər məzhəb və dindən olanlara, məsələn, şiə, xrıstian və yəhudilərə haramdır?"
Digər sosial şəbəkə istifadəçiləri də şirkətin rəsmi səhifəsində bu məsələ ilə bağlı etirazlarını bölüşüblər.

"Səba” Broyler mövzu ilə bağlı "Arqument.az"ın sorğusuna cavab olaraq bildirib ki, şirkət özünün "Feysbuk" səhifəsində problemlə bağlı rəsmi açıqlama yayıb. 

Arqument.az-a göndərilən açıqlamada bildirilir ki, problem texniki səbəbdən baş verib: ""Səba” Azərbaycanda beynəlxalq və dövlət halal standartlarına malik ilk toyuq əti istehsalçısı və yeganə süd məhsulları markasıdır. 

Bir qida istehsalçısı kimi, halallıq bizim üçün təkcə dinimizin tələbləri deyil, həm də insan sağlamlığı üçün vacib istehsalat prosesləri zənciridir. "Səba” toyuq əti istehsalının halallığı hələ heç bir standart və sertifikat almadığı zamandan - Şabranda kəsimxananın üzü qibləyə tikilməsi ilə başlayıb. Qafqaz Müsəlmanları Ruhani İdarəsinin səlahiyyətli nümayəndələri dəfələrlə müəssisədə olub, kəsim və halallıq tələblərinə riayət qaydalarını izləyib, kəsimin ölkə müsəlmanlarının qəbul etdiyi şəriət qaydalarına uyğunluğu barədə rəylərini bildiriblər. 

2014-cü ildə ilk dəfə GİMDES Halal və Tayyib Sertifikatı ilə bağlı "Səba” müəssisələrində (həm kəsimxana, həm qablaşdırma, həm toyuqların bəslənməsi yerləri, qida təchizatı anbarları, qablaşdırma materialları və digər) yoxlamalar aparılıb, müəssisə sertifikatlaşdırıldıqda da verilən sertifikatda kəsimin məhz bütün məzhəblərə uyğun aparıldığı göstərilmişdir və hər il yoxlama zamanı bu fakt bir daha yenilənmiş sertifikatlarda əksini tapır. Bunu nəzərə alan GİMDES "Səba”nın istifadə etməsi üçün loqoda heç bir məzhəb göstərilməməsi barədə razılıq verib". 

"Qeyd edək ki, GİMDES loqolarından birində yer alan 4 məzhəb islamın halal qidaya ən sərt tələbləri olan məzhəbləridir və təşkilat bu tələbləri gözlədiyini bununla nümayiş etdirir. GİMDES nüfuzuna güvənən istehlakçılarımızın bizə dəfələrlə müraciətindən sonra bu qurumun bizim üçün xüsusi təsdiqlədiyi loqonu məhsullarımızın qablaşdırması üzərinə vurmağı qərara aldıq. Lakin təəssüf ki, çap şirkətinin dizayneri göndərilən loqonun keyfiyyətdə uyğun gəlmədiyini düşünərək, qurumun internet saytından yüklənən halal nişanından istifadə etmiş, məsul əməkdaşlarımız da bu yanlışlığı diqqətdən qaçırıblar", - deyə şirkətin açıqlamasında bildirilir.