Qlobal

Martın 7-də saat 12 radələrində Bakı şəhəri, Nəsimi rayonu, Puşkin küçəsi 1 ünvanında 1 nəfər qadının ölməsi barədə rayon prokurorluğuna məlumat daxil olub.

Bu barədə Nəsimi Rayon Prokurorluğundan məlumat verilib.

Prokurorluq əməkdaşları tərəfindən məhkəmə-tibb ekspertinin iştirakı ilə hadisə yerinə və meyitə baxış keçirilmiş, digər zəruri prosessual hərəkətlər yerinə yetirilmişdir.

İlkin araşdırmalarla müəyyən edilmişdir ki, 1987-ci il təvəllüdlü Namətova Şəfəq Məhərrəm qızı qeyd edilən ünvanda piyada hərəkətdə olan zaman Azərbaycan Dövlət Neft və Sənaye Universitetinin əsas korpusunda görülən təmir işləri ilə əlaqədar inzibati binanın ətrafına təhlükəsizlik tədbirləri üçün quraşdırılmış dəmir lövhələrdən birinin güclü küləyin təsirindən uçaraq onun üzərinə düşməsi nəticəsində ölmüşdür.

Faktla bağlı Nəsimi rayon prokurorluğunda Cinayət Məcəlləsinin 314.2-ci (səhlənkarlıq, ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda) maddəsi ilə cinayət işi başlanmışdır.

Hazırda iş üzrə zəruri istintaq hərəkətləri davam etdirilir.
 
***
 
Qlobal.az olaraq qeyd edək ki, Azərbaycan Dövlət Neft və Sənaye Universitetinin əsas korpusunda aparılan tikintinin keyfiyyətsizliyi və rəqəmlərin şişirdilməsi barədə aylar öncə məlumat vermişdik. 
 
O zaman nə universitet rəhbərliyi, nə də digər aidiyyatı qurumlar məsələyə münasibət bildirmədi. 
 
Həmin yazını təqdim edirik:

Neft və Sənaye Universitetinin iki lot üzrə (Abadlıq işlərinin satın alınması 545.019 manat, cari təmir işləri 2.515.152 manat) sifarişçi olduğu tenderin ümumi məbləği 3.060.141 (üç milyon altmış min yüz qırx bir) manat, tenderin qalibi isə "Tikinti Bərpa Firması" Məhdud Məsuliyyətli Cəmiyyəti (MMC) olub. 
 

 
"Tikinti Bərpa Firması" MMC 2011-ci ilin mart ayının 3-də Vergilər Nazirliyinin dövlət reyestrində qeydiyyata alınıb. Dövlət reyestrində şirkətin hüquqi ünvanı Quba şəhəri, 16-cı məhəllə göstərilib.
 
Qlobal.az xəbər verir ki, şirkətin qanuni təmsilçisi Cəfərov Rafiq İmamqulu oğludur. Məlumata görə Qobustan qəsəbə sakini Cəfərov Rafiq İmamqulu oğlu ötən ilin (2019) may ayında sözügedən şirkətin rəhbərliyinə keçirilib. 
 

 
Məlumatda o da qeyd olunur ki, Cəfərov Rafiqin və onun oğlunun adına çoxsaylı MMC-lər təsis edilib və bu şirkətlər dövlət maliyyəli qurumların satınalmalarında iştirak edərək qalib elan edilirlər. 
 
Neft və Sənaye Universitetinin tenderinin qalibi olan "Tikinti Bərpa Firması" MMC-nin internet ünvanı və faktiki ünvanı barədə məlumat yoxdur. 
 
Neft və Sənaye Universitetində "cari təmir" və "abadlıq" işləri aparacaq "Tikinti Bərpa Firması" MMC-nin mütəxəssisləri, rəsmi müqavilə ilə çalışan işçilərinin sayı, maddi-texniki bazası da qeyri-müəyyəndir. 
 

 
Eyni zamanda "Tikinti Bərpa Firması" MMC-nin "cari təmir" və "abadlıq" işləri aparması üçün müvafiq dövlət qurumlarının hansı lisenziyalarına sahib olduğu barədə də məlumata rast gəlinmir.
 
"Dövlət Satınalmaları Haqqında" Azərbaycan Respublikasının Qanununun 6-cı maddəsinin 6.2.1 bəndində malgöndərən-podratçı təşkilatların satınalma müqaviləsinin icrasını təmin etmək üçün müvafiq sahədə peşəkarlığının, təcrübəsinin, texniki və maliyyə imkanlarının, işçi qüvvəsinin, idarəetmə səriştəsinin və etibarlığının olmasının vacibliyi qeyd edilir.

Qlobal.az