Yüklərin Azərbaycan üzərindən daşınması tranzit gəliri artıracaq
Noyabr 10
14:29
2017
Cari ilin səkkiz ayında İran ilə Avropa İttifaqına (Aİ) daxıl olan dövlətlər arasında ticarət dövriyyəsinin həcmi 13,1 milyard avroya çatıb. Bu da ötən ilin müvafiq dövrü ilə müqayisədə iki dəfə çoxdur.
İranın milli statistika bürosunun məlumatına görə, qeyd olunan dövr ərzində Aİ-dən 6,6 milyard avro dəyərində idxal əməliyyatı aparılıb. İrandan Aİ-yə isə ixracın
həcmi 6,5 milyard avro dəyərində olub.
İranın Avropa ölkələri ilə idxal-ixrac əməliyyatlarının bir il ərzində bu qədər artması daşımaların artmasına səbəb olub. Bu fakt Şimal-Cənub beynəlxalq nəqliyyat dəhlizinin əhəmiyyətini daha da artırır. Təsadüfi deyil ki, İran dövlət dəmir yolu şirkətinin idarə heyətinin üzvü Hoseyn Aşuri gələn il daşınan yüklərin artacağını bildirib. O qeyd edib ki, qarşıdakı ildə İran təkcə Azərbaycan üzərindən 2,5 milyon ton yükü Rusiya və Avropa ölkələrinə daşıyacaq. Fransa, Almaniya, Böyük Britaniya, İtaliya və İspaniya İran ilə daha çox ixrac-idxal əməliyyatları aparan ölkələrdir.
Qeyd etmək lazımdır ki, Rəşt-Astara yolu istifadəyə verildikdən sonra H.Aşurinin göstərdiyi rəqəm dəfələrlə artacaq. Çünki H.Aşuri yalnız İranın ixrac etdiyi yüklərin həcmindən danışıb. Rəşt-Astara yolu ilə İrandan başqa, Fars körfəzi və Cənub-Şərqi Asiya ölkələrinin idxal-ixrac əməliyyatları da həyata keçiriləcək. Bütün yüklər Azərbaycanın üzərindən daşınacaq və ölkəmizin tranzit gəlirləri ciddi şəkildə artacaq.
